Ugreen — такая ж вядомая кампанія з Паднябеснай, што і Baseus. Абедзве яны вырабляюць велізарнае мноства цікавых і якасных аксесуараў на любы выпадак і дэвайс. Толькі пра Baseus у нас ведаюць добра, а Ugreen пакуль не такая папулярная. Нам прапанавалі патэсціраваць некалькі прылад кампаніі, якія могуць спатрэбіцца для арганізацыі хатняга ці працоўнага офіса. Мы пагадзіліся ў першую чаргу з-за патэнцыйна крутога блока сілкавання на 100 Вт і адразу з чатырма партамі для зарадкі. Зрэшты, і акрамя гэтага дэвайса хапіла цікавага. Далей раскажам аб сваіх уражаннях.
Шчыра кажучы, падобныя прылады мяне заўсёды здзіўлялі — навошта ноўтбуку падстаўка? Але, аказваецца, сапраўды ёсць людзі, у якіх стамляюцца рукі, калі яны працуюць за ноўтбукам, які стаіць паралельна сталу без ухілу.
Такія падстаўкі дапамагаюць зменшыць нагрузку на кісці дзякуючы таму, што клавіятура ноўтбука ў такім выпадку размяшчаецца пад вуглом да стальніцы. Суб'ектыўна, мне, наадварот, прасцей і зручней набіраць тэкст на ноўтбуку без усялякіх падставак. Але калі вы сапраўды ведаеце, што вам без такой прылады і жыццё/праца не мілыя, то можна паспрабаваць.
• Зручны падбор па параметрах з 200+ мадэляў
• Прапановы ад 56 магазiнаў у адным месцы
• Сумленныя зніжкі, гісторыя змены кошту
• Дастаўка па Беларусi
Нас у падстаўцы прыемна здзівіла якасць вырабу. Вельмі прыемна слізгаюць дзве распоркі, можна для рэлаксацыі карыстацца. Уся канструкцыя зроблена з металу, а ножкі прагумаваныя, каб ноўтбук не падрапаўся. Ёсць упоры, якія дазваляюць абраць з пяці вуглоў нахілу.
У камплекце ёсць чахольчык, сама падстаўка ў складзеным выглядзе займае мала месца, але важыць прыстойныя 235 г — як які-небудзь вялікі смартфон. Нешта яшчэ сказаць аб Ugreen LP451 40289 складана. Зроблена на ўзроўні, увага да дробязяў падкупляе. А ў цэлым карыснасць такога тыпу прылад — вельмі індывідуальная катэгорыя. Паспрабуйце, калі шмат працуеце за ноўтбукам і ў вас стамляюцца кісці.
Мінімалістычная бесправадная зарадка ў матавым корпусе белага колеру. Злёгку нахіленая пляцоўка не прымагнічвае смартфон, ён проста ставіцца на невялікі выступ. На гэтым жа выступе ёсць святлодыёд, па якім можна даведацца, зараджаецца тэлефон ці не. Слізгануць або ўпасці вашаму дэвайсу не дадуць прагумаваныя ўстаўкі, якія больш-менш надзейна трымаюць смартфон.
Да электрасеткі падключаецца праз раз'ём USB-C. У камплекце ідзе кабель USB-C—USB-C. А вось блок сілкавання давядзецца дакупіць асобна. Чахол на смартфоне працэсу зарадкі не мяшае. Ugreen CD221 пад час працы награваецца вельмі слаба. У зарадку ўстаноўлены дзве індукцыйныя шпулькі. Гэта азначае, што тэлефон можна зараджаць як у вертыкальным, так і ў гарызантальным становішчы. Апошняе можа быць зручна, напрыклад, калі захочаце паглядзець які-небудзь фільм. Акрамя таго, ніжняя шпулька спатрэбіцца для зарадкі бесправадных навушнікаў.
Хуткасць зарадкі залежыць не толькі ад Ugreen CD221, але таксама ад блока сілкавання і мадэлі тэлефона. Падтрымліваецца хуткая зарадка на 15 Вт, але не для ўсіх мадэляў. Большасць Android-смартфонаў зараджаецца на 10 Вт, а iPhone — на 7,5 Вт. Навушнікі задавольваюцца 5 Вт. У нас iPhone 13 mini з 80% да 100% зарадзіўся за гадзіну. Высновы? Прыемная, недарагая, прадуманая зарадка. Было б выдатна, калі б была падтрымка MagSafe, але ў такім выпадку пабачылі б зусім іншы кошт.
Незаменная рэч для бюджэтных MacBook і шматлікіх ноўтбукаў на Windows, уладальнікі якіх пакутуюць ад недахопу партоў. Канфігурацый такіх док-станцый — найвялікшае мноства. Сам я, напрыклад, час ад часу карыстаюся мадэллю з картрыдарам, HDMI, парай USB-A і адным USB-C. Або вось з трыма USB-A, адным USB-C і адным HDMI.
Корпус алюмініевы і нядрэнна рассейвае цеплыню. Пад час працы, напрыклад, з USB-назапашвальнікамі хаб можа прыстойна награвацца, таму ад лішкаў цяпла пазбаўляцца трэба. Даўжыня кабелю складае 15 см, ёсць абарона ад перагібу. Дарэчы пра кабель. Іх у партфоліа Ugreen таксама нямала, а адзін, метровы, быў і ў нас. Выкананы ў нейлонавай аплётцы, у канектараў таксама прысутнічае абарона ад перагібаў, абодва канектары зроблены пад вуглом 90 градусаў. Можа выкарыстоўвацца як для зарадкі (заяўлена падтрымка 100 Вт), так і для перадачы дадзеных на хуткасці да 480 Мбіт/с.
Вернемся да Ugreen CM136. Тут USB-C падтрымлівае тэхналогію PD і можа выкарыстоўвацца для зарадкі іншых дэвайсаў, нават манітораў. Праз порт HDMI можна перадаваць 4К-відэа з 30 к/с. Хуткасць перадачы дадзеных для «флэшак» абмежавана хутчэй самімі «флэшкамі». Карысная рэч. Галоўнае — вызначыцца, якая канфігурацыя партоў менавіта вам падыходзіць больш за ўсё. Як ужо гаварылася вышэй, пад час эксплуатацыі хаб прыкметна награваецца, аднак на яго працы гэта не адбіваецца.
А вось і самая цікавая прылада. Знешне амаль правільны квадрат з бакамі 7×7 см. «Правільнасці» мяшае толькі вытырклы штэпсель. Таўшчыня — крыху больш за 3 см, а вага — амаль 250 г.
Ugreen CD226 — прадстаўнік адносна новых GaN-зарадак. У аснове большасці пакуль дамінантных зарадак, як і ў цэлым усёй мікраэлектронікі, ляжыць крэмній. Аднак нядаўна для зарадных прылад новага пакалення сталі выкарыстоўваць нітрыд галію (GaN). Калі не ўдавацца ў падрабязнасці, то ў параўнанні з крамянёвымі такія блокі сілкавання больш кампактныя пры той жа ёмістасці, не схільныя да моцнага нагрэву і значна радзей псуюцца. Такая маленькая рэвалюцыя, якая непрыкметна прыйшла ў сегмент блокаў сілкавання. Корпус Ugreen CD226 зроблены з матавага пластыка шэрага колеру. Мінімалізм разбаўляе толькі маркіроўка 100 Вт на адным баку, а таксама пералік велізарнай колькасці рэжымаў працы зарадкі на адным з тарцоў. І на гэты раз — ніякіх надаедлівых (асабліва па начах) святлодыёдаў. У тэорыі адначасова можна зараджаць да чатырох прылад. Але трэба ўлічваць, што да 100 Вт на порт здольныя выдаваць толькі першыя два парты USB-С, а трэці USB-С і USB-А абмежаваны 22,5 Вт кожны. Пры гэтым, калі збіраецеся адразу зараджаць некалькі сур’ёзных апаратаў накшталт ноўтбукаў, трэба ўлічваць мноства параметраў. Мясцовыя 20 В і 5 А дынамічна размяркоўваюцца паміж усімі партамі з улікам магутнасці як саміх партоў, так і падлучаных да іх прылад.
Увогуле, разлічваць на тое, што Ugreen CD226 зможа адначасова зарадзіць чатыры ноўтбукі, не варта. Два пацягне «на ўра», але пытанне, што вы захочаце падключыць да трэцяга і чацвёртага партоў. Розных камбінацый можа быць вельмі шмат, аднак галоўны прынцып такі: стабільна і хутка адначасова будуць зараджацца два «цяжкіх» дэвайса накшталт ноўтбукаў, смартфон і, можа быць, дробязь тыпу гадзінніка ці навушнікаў. У рэальнасці сцэнар выкарыстання такіх блокаў сілкавання куды больш празаічны. На пачатак вырашылі параўнаць, як 100-ватны Ugreen CD226 будзе зараджаць MacBook Air на М1 у параўнанні з камплектнай зарадкай на 30 Вт. Тая зараджае лэптоп на 10% за 12 хвілін. У Ugreen на тыя ж 10% пайшло 7 хвілін. Яшчэ раз падкрэслім, што аднаго блока сілкавання на 100 Вт недастаткова, каб усе гэтыя 100 Вт пайшлі на зарадку прылады — для гэтага сама прылада павінна быць гатова «прыняць» гэтыя ваты. Такіх дэвайсаў вельмі мала, таму ў дадзеным выпадку 100-ватны блок добры менавіта тым, што можа з высокай хуткасцю зараджаць некалькі дэвайсаў.
Дык што будзе з зарадкай MacBook, калі заняць справай кожны порт у зарадным блоку? Апроч Air падлучылі да Ugreen два смартфоны (iPhone і Honor), а таксама Apple Watch series 7. Пры такім раскладзе ноўтбук зарадзіўся на 10% за тыя ж 7 хвілін. Астатнія прылады таксама зараджаліся на максімальна магчымай для іх хуткасці. Сам блок сілкавання пры гэтым зусім крыху пацяплеў. Старонняга піску, якім грашаць некаторыя БС, няма. Адзінае, часам пры падлучэнні тэлефона ці ноўтбука (нейкай зразумелай заканамернасці вывесці не атрымалася) астатнія прылады на імгненне адключаюцца ад зарадкі.
За прылады для агляду дзякуем «Портатив».
Наш канал у Telegram. Далучайцеся!
Ёсць пра што расказаць? Пішыце ў наш тэлеграм-бот. Гэта ананімна і хутка
Перадрук тэксту і фотаздымкаў Onliner без дазволу рэдакцыі забаронены. ng@onliner.by