Забойца ўсіх? Агляд смартфона Honor Magic4 Pro

16 268
08 августа 2022 в 8:00
Источник: Зміцер Адашкевіч. Фото: Улад Барысевіч

Забойца ўсіх? Агляд смартфона Honor Magic4 Pro

Источник: Зміцер Адашкевіч. Фото: Улад Барысевіч

У лінейку смартфонаў Magic у Honor уваходзяць эксперыментальныя апараты. Іх можна назваць па-сапраўднаму флагманскімі і найбольш высокатэхналагічнымі ў партфоліа вытворцы. У гэтых апаратах Honor паказвае, на што кампанія здольная. Там прымяняецца перадавое «жалеза» і сучасныя рашэнні. На жаль, за межы Кітая мадэлі лінейкі Magic выбіраюцца не часта. Аднак у нас з'явілася магчымасць патэсціраваць найноўшы Honor Magic4 Pro. Апарат сапраўды максімальна тэхналагічны. Але пра ўсё па парадку.

Android, экран 6.81" OLED (1344x2772) 120 Гц, Qualcomm Snapdragon 8 Gen1 SM8450, ОЗУ 8 ГБ, память 256 ГБ, камера 50 Мп, аккумулятор 4500 мАч, 2 SIM (nano-SIM/eSIM), влагозащита IP68

Знешні выгляд

Мяркуючы па ўсім, пры стварэнні Magic4 Pro інжынеры кіраваліся правілам «усяго самага лепшага, ды пабольш». У трэндзе вялікія OLED-дысплэі? Давай паставім самы вялікі! Прасунутыя камеры? Ёсць і такія! Шалёна хуткая зарадка? Усунем! Не дзіва, што і знешнасць для смартфона абралі самую «топавую».

Раз так, то нічога дзіўнага ў выгнутых баках дысплэя няма. Усе Android-флагманы ўсё яшчэ выкарыстоўваюць гэты прыём. Выглядае і праўда эфектна. Наконт практычнасці ёсць пытанні, але пакуль сярод спажыўцоў такое рашэнне запатрабавана, да яго будуць звяртацца.

З усіх бакоў тэлефон захутаны ў трывалае шкло, толькі па перыметры ідзе тоненькая сталёвая рамка, якая пашыраецца на ніжнім і верхнім тарцы. Выглядае такое спалучэнне вельмі дорага-багата. Адваротны бок — ізноў жа практычнасць. У нас была мадэль чорнага колеру, якая вельмі добра збірае адбіткі пальцаў.

На тыльнай панэлі — велізарны круг з россыпам камер, датчыкаў, успышкай. Не, на гэты раз амаль усё гэта не фэйкавае, а нават вельмі працоўнае. Але пра магчымасці камеры — крыху ніжэй.

Ад вады і пылу тэлефон абаронены па стандарце IP 68. Карту памяці не паставіш, затое дзве SIM-карты можна. Сканер адбітка пальцаў убудавалі пад экран. Гаворка пра даволі свежы сэнсар Qualcomm 3D Sonic другога пакалення. У адрозненне ад папярэднікаў, ён ужо пазбаўлены ад недахопаў падобнага роду датчыкаў — працуе імгненна, памылковых распазнаванняў вельмі мала. Па-ранейшаму яго не намацаеш усляпую, але гэта ўжо неадольная перашкода для любых ультрагукавых «распазнавальнікаў».

У Magic4 Pro добра папрацавалі над 3D-разблакіроўкай па твары. Тут ужо не проста франтальная камера, як у большасці Android-дэвайсаў. Побач з «франталкай» убудавалі сэнсар, які адказвае за пабудову трохмернай «карты» спажыўца. Атрымалася нешта накшталт iPhone. Ва ўсякім разе па хуткасці рэакцыі сапраўды не горш. Разблакіроўка па твары працуе і днём, і ноччу, і ў акулярах, і без іх. Нарэшце атрымалі працаздольны метад не толькі ў iOS, але і на Android.

Honor Magic4 Pro сучасны і прыгожы, але карыстацца ім трэба максімальна асцярожна. Тэлефон вялікі, схільны да кіравання дзвюма рукамі. Пры гэтым шкляны корпус слізкі, так што трымаць у руках тэлефон трэба вельмі моцна.

Дысплэй

Пра экран можна сказаць адно: што было найлепшае, тое і паставілі. Велізарная AMOLED-матрыца з дыяганаллю 6,81 цалі мае максімальную разрознасць 1312×2848 кропак (460 ppi), умее адлюстроўваць больш за мільярд колераў, валодае вельмі высокай пікавай яркасцю 1000 ніт і можа пахваліцца частатой абнаўлення 120 Гц.

Выглядае гэта хараство гэтак жа добра, як і характарыстыкі матрыцы. Дарэчы, частата абнаўлення можа мяняцца дынамічна ад 1 да 120 Гц у залежнасці ад сцэнарыя выкарыстання смартфона. Прама як у iPhone 13 Pro. Вытворца таксама заяўляе пра рэкордна высокую шыротна-імпульсную мадуляцыю на ўзроўні 1920 Гц. Калі сцісла, то дзякуючы гэтаму ў вас не будуць балець вочы, калі яны адчувальныя да мігацення OLED-матрыц.

Было б зусім добра, калі б дысплэй яшчэ быў плоскі, а не выгнуты. Зрэшты, гэта справа густу. Ведаю рэальных людзей, якім гэтая выгнутасць сапраўды «заходзіць». У астатнім — шыкоўны экран.

«Жалеза»

І тут ніякіх кампрамісаў. У Magic4 Pro ўсталявалі самы магутны на момант вясновага анонса працэсар — Qualcomm Snapdragon 8 Gen 1. Чып хуткі, па-сапраўднаму флагманскі, але не без праблем. Справа ў тым, што працэсар атрымаўся вельмі гарачы. Таму ў многіх тэлефонах яго патэнцыял не раскрываецца — пры высокай нагрузцы тэмпература даходзіць да парогавых значэнняў, і сістэма вымушана зніжаць частоты працэсара.

Быў сведкам, калі флагманскі смартфон адной кампаніі зніжаў прадукцыйнасць Qualcomm Snapdragon 8 Gen 1 да 60% адразу пасля запуску тэста на тротлінг. Увогуле, вельмі шмат залежыць, як вытворца смартфона здолеў астудзіць гэты гарачы чып.

У Honor, відаць, ведалі, з чым мелі справу. Напэўна, і пра ахаладжэнне паклапаціліся. Да таго ж сваю ролю адыгралі памеры тэлефона, якія дазваляюць рассейваць цяпло на большай паверхні. Так, прадукцыйнасць Magic4 Pro пад нагрузкай таксама змяншаецца, але плаўна і ўсяго на 20%. Гэта вельмі добры для Snapdragon 8 Gen 1 паказчык.

Што яшчэ, апроч чыпа? 8 ГБ аператыўнай памяці і накапляльнік на 256 ГБ. Разумны максімум для Android-флагманаў, хоць менавіта накапляльнік у наш час ужо можна было б ставіць і на 512 ГБ.

У бенчмарках смартфон уваходзіць у топ самых моцных смартфонаў. У астатнім і жаліцца няма на што — усё, ад інтэрфейсаў да гульняў, працуе вельмі хутка без намёкаў на лагі. Зачын на будучыню велізарны, абы астуджэнне не падводзіла.

Зарадка

Вельмі шмат увагі распрацоўшчыкі надалі зарадным здольнасцям тэлефона. Па-першае, Magic4 Pro падтрымлівае ўльтрахуткую правадную зарадку на 100 Вт. Па-другое, і бесправадная таксама на 100 Вт! Праўда, такую зарадку яшчэ трэба знайсці. А вось прыдатны блок сілкавання ідзе ў камплекце.

Да чаго прыводзяць усе гэтыя ваты? Да таго, што за 15 хвілін смартфон зараджаецца на 50% (у нашым выпадку на 48%), а поўнасцю папаўняе зарад за паўгадзіны. Такой хуткай зарадкі ў Honor яшчэ не было.

Што да аўтаномнасці, то тут без сюрпрызаў. Акумулятара ёмістасцю 4600 мА·г хапае на суткі вельмі актыўнай працы з мноствам гульняў, званкамі праз Telegram і GPS-навігацыяй. У рэжыме выкарыстання, больш набліжаным да штодзённага, зараджаць тэлефон давядзецца раз у паўтара дня.

Камеры

Пяць камер! Хто большы? Блок з камерамі Magic4 Pro можа нагадваць вочка насякомага. Насамрэч асноўных камер тры, а яшчэ два модулі — гэта датчык глыбіні сцэны і нейкі датчык мігацення. Карыстальніку ж дазваляецца мець справу з 50-Мп камерай, звышшырокавугольным сэнсарам (таксама на 50 Мп) і з 64-Мп перыскопным тэлеаб'ектывам.

У працэсе фотаздымкі сістэма амаль заўсёды задзейнічае асноўны фотамодуль. Гэта значыць, што, нават калі вы здымаеце на ўльтрашырокавугольны сэнсар, смартфон таксама зробіць фота на 50-мегапіксельны асноўны фотамодуль, а потым аб'яднае абодва здымкі для дасягнення лепшай якасці. Тое ж самае тычыцца і здымкаў на тэлефотакамеру. А яшчэ перад намі прыклад, калі Honor не стала дадаваць непатрэбны макрааб’ектыў, а здымкі з максімальным набліжэннем выдатна робіць «ультрашырык».

Дзённыя фота сюрпрызаў не прынеслі. Прыемна здзівілі фота ў рэжыме супермакра. Той выпадак, калі вытворца дае рэальна цікавую магчымасць.

З набліжэннем сітуацыя наступная. Пры аптычным зуме да 3,5 атрымліваем здымкі выдатнай якасці без артэфактаў, якія заўсёды выяўляюцца пры лічбавым павелічэнні. Далей, вядома, якасць змяншаецца. Тым не менш да дзесяціразовага зума ўключна набліжэннем у цэлым можна карыстацца. У прынцыпе, нават 40-кратны зум па якасці выйграе ў лічбавага кропа з 50-мегапіксельнага здымка. А вось 100-кратнае набліжэнне — ужо чыста маркетынгавая фішка, як і ва ўсіх апаратаў з падобнай функцыяй.

Хто ёсць хто, становіцца ясна ноччу. Размешчаныя ніжэй здымкі былі зроблены ноччу ў амаль поўнай цемры. Тым не менш сістэма здолела недзе разглядзець палоску сіняга колеру і акуратна яе пазначыла. Начныя фота прыемна здзіўляюць выразнасцю, адсутнасцю шумаў, далікатнай работай з ценямі і светлымі ўчасткамі. Яшчэ больш цікава, што ўсё гэта ў поўнай меры датычыцца і ўльтрашырокавугольнага модуля. Звычайна ў смартфонах ён непрыдатны для здымкаў у прыцемках, але толькі не ў гэты раз.

Канкурэнты і вынікі

Канкурэнты ў Honor Magic4 Pro — усе актуальныя флагманскія смартфоны. Аднак у нашых рэаліях параўнаць іх складана па адной прычыне: мадэль ад Honor у нас не прадаецца.

Калі не звяртаць увагі на гэтыя два безумоўна важныя фактары (няма цэн, няма ў наяўнасці), то перад намі — топавы смартфон з максімальна магчымымі сёння характарыстыкамі, выдатнай камерай, флагманскім працэсарам, вельмі хуткай зарадкай.

Onlíner рекомендует
Android, экран 6.67" OLED (1080x2400) 120 Гц, Qualcomm Snapdragon 778G+, ОЗУ 8 ГБ, память 256 ГБ, камера 54 Мп, аккумулятор 4800 мАч, 2 SIM (nano-SIM)
Android, экран 6.7" IPS (1080x2388) 90 Гц, Qualcomm Snapdragon 680, ОЗУ 6 ГБ, память 128 ГБ, камера 64 Мп, аккумулятор 4000 мАч, 2 SIM (nano-SIM)
Android, экран 6.81" IPS (1080x2388) 90 Гц, Qualcomm Snapdragon 680, ОЗУ 6 ГБ, память 128 ГБ, камера 64 Мп, аккумулятор 4800 мАч, 2 SIM (nano-SIM)

Наш канал у Telegram. Далучайцеся!

Ёсць пра што расказаць? Пішыце ў наш тэлеграм-бот. Гэта ананімна і хутка

Перадрук тэксту і фотаздымкаў Onlíner без дазволу рэдакцыі забаронены. ng@onliner.by