Амаль планшэт. Агляд смартфона Honor X9

15 787
11 июля 2022 в 8:00
Источник: Зміцер Адашкевіч. Фото: Улад Барысевіч

Амаль планшэт. Агляд смартфона Honor X9

Разыгрываем Playstation и Dyson в приложении Каталог Onlíner каждую пятницу

У новай лінейцы смартфонаў Honor сярэдняга цанавога сегмента тры мадэлі — Х7, Х8 і Х9. З першымі дзвюма мы ўжо паспелі пазнаёміцца, сёння надышла чарга трэцяга апарата, самага дарагога і наварочанага ў лінейцы Х. Мадэль Honor X9 атрымала некаторыя флагманскія функцыі, але пры гэтым прадаецца па цане ніжэй за 1000 рублёў. Ці атрымалася спалучэнне «нядорага і багата»? Спрабуем разабрацца.

Android, экран 6.81" IPS (1080x2388) 90 Гц, Qualcomm Snapdragon 680, ОЗУ 6 ГБ, флэш-память 128 ГБ, камера 64 Мп, аккумулятор 4800 мАч, 2 SIM
Android, экран 6.81" IPS (1080x2388) 90 Гц, Qualcomm Snapdragon 680, ОЗУ 6 ГБ, флэш-память 128 ГБ, камера 64 Мп, аккумулятор 4800 мАч, 2 SIM
Android, экран 6.81" IPS (1080x2388) 90 Гц, Qualcomm Snapdragon 680, ОЗУ 6 ГБ, флэш-память 128 ГБ, камера 64 Мп, аккумулятор 4800 мАч, 2 SIM

Дызайн

Ужо па папярэдніх мадэлях бачна, што ў Honor знайшлі формулу, якая павінна спадабацца як мага большай колькасці патэнцыйных пакупнікоў. Для аматараў незвычайнага — прыемны матавы пластык з прыгожымі пералівамі. Яшчэ ёсць глянцавы сіні і глянцавы чорны. Апошні быццам бы звычайны, але дзякуючы залацістаму кольцу ў блоку з камерамі выглядае на дзіва прывабна. У кожным каляровым выкананні гэтае кольца пафарбаванае ў колер корпуса, і толькі ў чорным ёсць спалучэнне з залатым.

Апарат вялізны за кошт гіганцкага дысплэя. Так што трымаць — толькі двума рукамі. У адваротным выпадку рызыкуеце выпусціць тэлефон. Корпус цалкам пластыкавы, у тым ліку рамка па перыметры.

Злева нічога няма, а справа бачым кнопку рэгулявання гуку і ўтопленую клавішу ўключэння з убудаваным дактыласкапічным датчыкам. Сэнсар выдатны, спрацоўвае імгненна і беспамылкова. Зверху знаходзяцца мікрафон і дынамік «пад вуха». Знізу — дынамік, порт USB-C і яшчэ адзін мікрафон. Там жа размешчаны латок для дзвюх SIM-картак. Гук моцны і без скажэнняў, хоць ідзе з аднаго дынаміка.

На тыльнай панэлі прыцягвае ўвагу велізарны кругляш з камерамі і надпісам MATRIX. Выглядае ён настолькі ўражальна, што адразу прымушае паверыць у флагманскія фотаздольнасці смартфона. Тым не менш падманвацца не варта: гэта больш дызайнерскае вынаходніцтва, а не інжынерная неабходнасць. Але пра гэта пазней, у аглядзе магчымасцей камеры.

X9 — сімпатычны, вялікі і даволі цяжкі апарат вагой пад 200 грамаў. Цікава, што пры гэтым ён крыху лягчэй, чым малодшы ў лінейцы і больш кампактны Х7. Адной рукой кіраваць такой прыладай няпроста, але, упэўнены, пра гэты нюанс выдатна ведаюць тыя, хто выбірае тэлефоны з вялізнымі экранамі.

Дысплэй

Мабыць, галоўны герой гэтага агляду. Дыяганаль дысплэя ў X9 складае 6,81 цалі. У сегменце недарагіх смартфонаў такія выпадкі сустракаюцца вельмі рэдка, што робіць з гэтай мадэлі ледзь не ўнікальную прапанову.

Вялікія матрыцы можна знайсці ў некаторых не самых вядомых брэндаў, аднак акрамя дыяганалі прапанаваць ім няма чаго. Тут ж — удалы сімбіёз з дыяганалі ды іншых характарыстык. Высокая разрознасць 1080×2388 кропак дае 395 ppi. Гэта значыць, што карцінка не пакутуе ад «мыла», як гэта было ў X7.

Падтрымліваецца частата абнаўлення 90 Гц. Пры такой вялікай дыяганалі гэта дае свой плён: дадатковая плаўнасць у інтэрфейсе (па сутнасці, толькі ў ім) адчуваецца. Да таго ж высокі запас яркасці дазваляе разгледзець карцінку пры яркім сонцы.

Усталяваная ў X9 матрыца — прыклад таго, якім павінен быць вялікі экран у смартфонах сярэдняга цанавога дыяпазону. Яшчэ не OLED, але якасны IPS з высокай разрознасцю, шустрым абнаўленнем і годным запасам яркасці.

Прычапіцца няма да чаго, ну толькі калі вас раптам збянтэжыць адтуліна для франтальнай камеры.

Жалеза

Усе тры смартфоны лінейкі Х пабудаваны на адной платформе і адрозніваюцца толькі аб'ёмам аператыўнай памяці: у малодшай мадэлі X7 усяго 4 ГБ, тады як у Х8 і Х9 — 6 ГБ.

Да гэтага аб’ёму могуць далучацца яшчэ 2 ГБ так званай віртуальнай аператыўкі. Размова ідзе пра вылучэнне дадатковага аб’ёму з асноўнага накапляльніка ёмістасцю 128 ГБ. Гэтая памяць пры неабходнасці можа выкарыстоўвацца для захавання дадаткаў і імгненнага доступу да іх. На жаль, праверыць такое на практыцы за кароткі тэрмін складана. Аднак 6 ГБ і так дастаткова для патрэб карыстальніка.

Апарат базіруецца на 6-нанаметровым чыпе Snapdragon 680 з васьмю ядрамі (схема 4+4) і графікай Adreno 610. Гэта даволі свежая платформа, анансаваная паўгода таму. Чып адносіцца да ніжняга сегмента працэсараў сярэдняга ўзроўню.

У стрэс-тэсце на тротлінг чып паказаў сябе добра. Даволі хутка пасля запуску бенчмарка частоты зніжаюцца, аднак зусім крыху і далей трымаюцца прыкладна на ўзроўні 90% ад максімуму. Раптоўных падтармажванняў і завісанняў не будзе.

Добры халодны працэсар з прыстойнай для свайго ўзроўню хуткадзейнасцю. Можна гуляць у што-небудзь накшталт CoD Mobile на сярэдніх наладах. З такім буйным экранам смартфон схіляе да гульняў.

І ўсё ж менавіта ў X9 хацелася б бачыць чып узроўнем вышэй. Бо ў больш даступных X7 і X8 сапраўды такі ж працэсар. Для іх гэта выдатны паказчык, але ў флагмана лінейкі магло б быць і штосьці больш моцнае.

Камеры

Асноўная камера 64-мегапіксельная, але «з каробкі» дзякуючы аб'яднанню пікселяў здымае на 16 Мп. Так лепш за ўсё і пакінуць, бо вялікая колькасць пікселяў на якасці здымка станоўча не адаб'ецца ў адрозненне ад большай святлоадчувальнасці.

Здаецца, сэнсар такі ж, які мы бачылі ў X8. Што гэта азначае? Тое, што пры дастатковай колькасці святла апарат можа парадаваць якасцю фота. Праўда, ужо даўно розніцу паміж топавым смартфонам і прадстаўніком сярэдняй цанавой катэгорыі трэба шукаць пад мікраскопам.

А вось пры недахопе святла звычайна і бачым розніцу паміж топавымі і бюджэтнымі рашэннямі. Мадэль X9 робіць неблагія здымкі на прыцемку. Для гэтага трэба абавязкова выкарыстоўваць начны рэжым і чакаць секунд пяць.

У параўнанні з X8 звышшырокавугольны модуль раздзьмулі з 5 да 8 Мп, аднак разлічваць на яго ўсё роўна не варта. З добрага тут хіба што карэкцыя скажэнняў па вуглах. У астатнім — вельмі пасрэдная якасць. На прыцемку гэтая камера становіцца зусім бескарыснай.

Ёсць яшчэ два сэнсары, аднак гэта той выпадак, калі яны прысутнічаюць намінальна. Размова пра датчык глыбіні рэзкасці і макракамеру. Апошняя, як гэта часта бывае, здымае куды горш, чым калі проста кропнуць здымак з асноўнай камеры.

Кроп з асноўнай камеры
Макракамера

Фотамагчымасці ў X9 не адрозніваюцца ад таго, што мы бачылі ў X8. І там, і там вельмі неблагі асноўны фотамодуль, а яшчэ тры камеры, можна лічыць, убудаваны хіба што для прыгажосці. Амаль усім галоўнай камеры хопіць з запасам, а вось аматарам мабільнай фатаграфіі ў любым выпадку прыйдзецца прыглядацца да куды больш дарагіх мадэляў.

Акумулятар

У дадатак да экрана гэты параметр можна лічыць яшчэ адной істотнай фішкай смартфона. Ёмістасць батарэі складае 4800 мА·г. Разам з не вельмі патрабавальным працэсарам гэта дае як мінімум двое сутак працы на адной зарадцы. Калі не запускаць мабільныя гульні, задавальненне можна без праблем расцягнуць на тры дні.

Падтрымліваецца хуткая зарадка на 66 Вт. Пры гэтым неабходны блок ужо ёсць у камплекце. За 5 хвілін ад камплектнай зарадкі смартфон зараджаецца на 10%, за 20 хвілін — на 50%. Для поўнай зарадкі неабходна каля 50 хвілін. Сёння гэта не рэкорд, але ўсё роўна вельмі добрая дапамога, асабліва для такога ёмістага акумулятара.

Канкурэнты

Калі браць пад увагу велізарны дысплэй з дыяганаллю больш за 6,8 цалі, то канкурэнтаў у Honor X9, па сутнасці, няма. А вось калі 0,1—0,2 цалі не маюць для вас прынцыповага значэння, то спіс альтэрнатыў пашыраецца.

Той жа Honor X8 адрозніваецца хіба што дызайнам, дысплэем з дыяганаллю 6,7 цалі замест 6,81 і падтрымкай хуткай зарадкі на 22,5 Вт замест 66 Вт. Пры гэтым танней на 100 рублёў.

Яшчэ ёсць POCO X4 Pro 5G, у якога падобны кошт і характарыстыкі. На яго баку — стэрэадынамікі, матрыца AMOLED на 120 Гц і больш моцны чып. У Honor X9 лепшая камера, большы дысплэй, універсальны і цікавы дызайн (суб'ектыўна) і, як ні дзіўна, меншая вага.

Вывады

У Honor X9 ёсць дзве адметныя асаблівасці. Першая — выдатная велізарная матрыца. Аналагаў у гэтым сегменце не сустрэць. Атрымліваецца нядрэнны кампрамісны варыянт паміж смартфонам і міні-планшэтам.

Другая асаблівасць — высокая аўтаномнасць з хуткай зарадкай. Няхай мадэль па гэтым паказчыку не рэкардсмен, але зарадку такога ёмістага акумулятара на працягу менш чым гадзіны ацэняць многія.

Плюс нам спадабаліся знешні выгляд і асноўная камера. А яшчэ нядрэнны працэсар, які спраўляецца са сваімі абавязкамі. Тым не менш у старэйшай мадэлі лінейкі Honor X хацелася б бачыць нешта больш моцнае.

Чытайце таксама:

Android, экран 6.81" IPS (1080x2388) 90 Гц, Qualcomm Snapdragon 680, ОЗУ 6 ГБ, флэш-память 128 ГБ, камера 64 Мп, аккумулятор 4800 мАч, 2 SIM
Android, экран 6.81" IPS (1080x2388) 90 Гц, Qualcomm Snapdragon 680, ОЗУ 6 ГБ, флэш-память 128 ГБ, камера 64 Мп, аккумулятор 4800 мАч, 2 SIM
Android, экран 6.81" IPS (1080x2388) 90 Гц, Qualcomm Snapdragon 680, ОЗУ 6 ГБ, флэш-память 128 ГБ, камера 64 Мп, аккумулятор 4800 мАч, 2 SIM

Наш канал у Telegram. Далучайцеся!

Ёсць пра што расказаць? Пішыце ў наш тэлеграм-бот. Гэта ананімна і хутка

Перадрук тэксту і фотаздымкаў Onlíner без дазволу рэдакцыі забаронены. ng@onliner.by

Источник: Зміцер Адашкевіч. Фото: Улад Барысевіч